مساوات سایتی‌نین وئردییی خبره گونره، ایرانشناسی بنیادی‌نین آذربایجان شعبه‌سی طرفینده قورولان بو توره‌نه چوخلو عالیم و ضیالی شخصیت‌لر قاتیلمیشدیلار.
بو مراسیمده، تبریز بیلیم یوردونون تاریخ، سیاسی علم‌لر و تورک دیل و ادبیات گروپ‌لاری‌نین بیر نئچه اوستادی چیخیش ائدیب، آنادیلی باره‌سینده و بوتون تحصیلی مقطع‌لرده اویره‌نجی‌لرین آنادیلده تحصیل‌آلماقلاری‌نین ضرورتینه تاکید ائتدیلر.
محمد طاهری خسروشاهی؛ ایرانشناسی بنیادی‌نین آذربایجان شعبه‌سی‌نین رییسی اولاراق، بو توره‌نین باشلانیشیندا، آنادیلی مساله‌سین، آذربایجان میللتی‌نین ان مهم دغدغه‌لرینده‌ن ساییب، دئدی: بیر مدنی جامعه‌ده، گره‌ک‌مز همیشه بیر عیدده سوز آپاریجی و او بیری عیدده قولاغاسان اولالار. درین فیکری اختلاف‌لارین اولماسینا باخمایاراق، آنا دیلی قونوسوندا بیر دیالوگا ال‌تاپمالی‌ییق.
طاهری خسروشاهی، دونیا آنادیلی گونو مناسبت‌ینه کئچیریلن بو توره‌نی، ایران اولکه‌سینده، ریاست جمهورو نهادی‌نین چرچیوه‌سینده یئرلشن تشکل‌لار طرفیندن قورولان بیرینجی توره‌ن بیلدیریب، آرتیردی: اوموروق بو توره‌ن گلجه‌ک‌ده بونا تای توره‌ن‌لرین قورولماسینا بیر یول آچمیش اولاجاق.
