مساوات- احمد حسننژاد: تازا گؤزلمه اییی، تندیرین چیککیلدایان سسی و دهده حوسئین چاییایله کورسونون کونجونده اوتورموشدو. گؤزلری یوخولو ایدی، آمما نوهلری “پیر آغاجی”ندان سوروشاندا ائلهبیل ایچی جانلاندی…
اوخ بالالار! قیش گونلرینده یوخودان قالان قاریلار دانیشار بئله، یاتا – یاتا. منده سیزه بیر داستاندان دانیشیم، پیر آغاجینین احوالاتیندان. بورایا یاخشی قولاق آسین:
قاراداغین اوجالیقلاریندا، دومانلی درهنین کناریندا، بیر گوی آلما آغاجی واریدی. آدی “پیر آغاجی” قالمیشدی. قالین، هوندور، آدام قاپیسی قدهر ائنلی، گؤیه بویلانمیش بیر آغاج. دئییردیلر؛ بو آغاج اصلینده بیر اینسان روحودور.
بیر زامانلار اوردا یاشلی بیر کیشی یاشامیشدی. محبتلی بیر پیر. چؤرهیینی اوشاقلارلا بؤلردی، یارالیلاری ساغالداردی، قوزولاری یئدیردردی، قویون ایتیرهن چوبانلارا یاردیم ائدردی، گئجهلر اولدوزلارین آلتیندا آللاهلا گؤزیاشلاری ایله پیچیلداشیب، دوعا ائدردی.
قیش گونلرینین بیرینده دوشمن هوجوم ائدیب، پیرین جانینی آلدی. بدهنی توپراغا گئتدی، آمما روحو ایسه گئتمهدی، بیر آغاجا چئوریلیب اورادا قالدی. سسسیز، عظمتلی و اوزو قبلهیه دوغرو بیر موقددس آغاج کیمی.
ایندیسه هامی او آغاجا پناه آپارار. کیم دردینی گؤتورمک ایستهسه، گئدهر او آغاجین یانینا و اورادان ساغالاراق قاییدار.
آنام دئیهردی: پیر آغاجینین یانینا گئدهنده هئش واخت گولمه، چوخ آستا دانیش، اورهیینی تمیزله. بوجور اولورسا آغاجین آرخاسیندا یئرلشن قویودان، بیر سس گلیر، ائلهبیل آللاه جاواب وئریر.
نوهلر سوسموشدو، قاشلار قالخمیش، چایلار سویوموشدو. دهده حوسئین دریندهن نفس آلیب، داوام ائتدی:
یاددا ساخلایین، او آغاجا قوربان کسنلر آغاج کیمی ثابیت و کؤکلو اولار. بیر گون شهردهن بیر آدام گلدی، دئدی: “بو آغاجی کسهجهیم، تاختاسیندان صاندیق دوزهلدهجهیم”. قاری بیر ننه اونا دئدی: “پیر آغاجینی کسهنین اؤز الی کسیلر.” ائلهده اولدو.
او گئجه، شهرلی قارانلیقدا داغا گئتدی. سحری اونو تاپدیلار؛ قولو سینمیش، آغاجین کوتویونه سؤیکنمیشدی، بالتا یانیندا، باخیشی پئشمان و سسسیز. او گوندهن، کولکده پیر آغاجینین یانیندان احتراملا کئچیر.
کورسونون اوزهرینه سوکوت کؤچدو. سادهجه اود چاتیلتیسی و پنجرهدن اهسن کولهیین سسی ائشیدیلیردی.