مساوات خبر سایتی‌نین ایشیق سایتیندان آلدیغی معلوماتا گونره، ادبیاتیمیزدا «آغشین آغ‌کمرلی» امضاعسی ایله تانینان «محمدتقی قاسمی» ۱۳۳۹-جی ایلده شبستر ماحالینین آغ‌کمر کندینده آنادان اولوب. اوشاقلیق ایللرینده عائله‌سی ایله بیرلیکده تهرانا کؤچوب، ابتدایی و اورتا تحصیلینی بو شهرده باشا ووردوقدان سونرا، دیش قاییرما صنعتینده فعالیته باشلاییب.
«آغشین آغ‌کمرلی»، گنجلیک ایللریندن آذربایجان ادبیاتینا، خصوصیله ده شعره بؤیوک ماراق گؤستریب، انقلابین غلبه‌سیندن سونرا تهرانین ادبی مجلیس‌لرینده فعال اشتراک ائدیب و تهراندا یاشایان آذربایجان شاعرلری سیراسیندا اؤزونه خصوصی ادبی مؤوقع قازانیبدیر. بو ایللرده او، مرحوم شاعرلریمیز «قافلانتی» و «تورک‌اوغلو»نون تشبثی ایله تهراندا یارانان و اؤز گئنیش فعالیتینه باشلایان «آرزو کاروانی» ادبی درنه‌یی‌نین فعال عضوو اولوب؛ ائله همین ایللرده «دنیزدن بیر داملا» آدلی ایلک شعرلر مجموعه‌سی اجازه‌دن کئچمه‌دن نشر ائدیلیب.
ایران- آذربایجان سرحدی آچیلدیقدان سونرا «آغشین آغ‌کمرلی»، آذربایجانا کؤچوب، عؤمرونون سونونادک باکی‌دا یاشاییب و ائله بو شهرده ده وفات ائدیبدیر. او «میشوو داغی» کولتور درنه‌یی‌نین قوروجوسو و «میشوو داغی» درگی‌سینین باش رئداکتورو ایدی.
«کیربیتچی قیز» هانس آندرسن‌دن (ترجومه)، «دوندورماچی» (اوشاقلار اوچون حیکایه)، «شنگول-منگول» (کؤچورمه)، «بیزی یاشادان تاریخ-ایسکمر» (کیمر تورکلری و بیر کند اوزره آراشدیرما) و «سویود آغاجی-نریمان حسن‌زاده- ۸۰ ایللیک عؤمور یولو کیتاب‌لاری «آغشین آغ‌کمرلی»نین ادبی ارثی سیاهه‌سینده‌دیرلر.
