مساوات – سیاوش مددی: «گولدورلو ولی»، ۱۳۳۴-جی ایلین مرداد آییندا شاعیرلر، عاشیق‌لار مسکنی اولان قاراداغین کلیبر شهری‌نین گولدور کندینده آنادان اولدو، گنج یاش‌لاریندان آنا یوردونون سئحیرلی، طراوتلی طبیعتیندن ایلهام آلاراق، شئعیر یازماغا باشلادی، ائله گنج ایکن باشقا یئرلی‌لری کیمی ایش تاپماق اوچون تهرانا کؤچمک مجبوریتینده قالدی. تهران‌دا اوزون ایل‌لر گولر اوزیله نقاش‌لیق صینف‌ینده شهرداش‌لارینین، وطن‌داش‌لارینین ائولرینی بزه‌دی، عینی زاماندا نقاش‌لار صینفی‌نین (اتحادیه صنفی نقاشان تهران)ده فعال بیر عضو کیمی چالیشدی.
«شاعیر ولی» صابیر انجومنی‌نین تأسیس‌یندن نئچه ایل سونرا، صابیر انجومنینه قوشولدو، عاشق‌لار ایله گئنیش ارتباط‌دا اولدوغو اوچون صابیر انجومنی‌نین موسیقی بؤلومونه مسؤول سئچیلدی. عینی زاماندا انجومنین مودیره هئیتینین سئچگی‌سینده صابیر انجومنی‌نین مودیره هئیتینه سئچیلدی. «شاعیر ولی» اون ایلدن آرتیق کؤنولو اولاراق بو مسؤولیتده چالیشدی.
ائل آراسیندا بئله بیر سوز وار «آدام گئدر، آدی قالار». بیزدن آیریلسادا، اونون خاطیره‌لری، اونودولماز شئعیرلری، شئعیرلرینه بسته‌لنن ماهنی‌لار ابدی اولاراق خالقیمیزین یادداشیندا یاشایاجاق.
«گولدورلو ولی»دن آغلی داغ، قارتال قایناغی، حسرت گوزگوسو، لامپاسیز اوتاق، دیوان «گولدورلی ولی» ادلی بئش کیتاب و بیر سیرا ایشیق اوزو گؤرمه‌ین شئعیرلر یادیگار قالیب.
ادبیات سئون‌لر ادبیاتیمیزین سماسین‌دا واخت‌سیز وعده‌سیز آخان شاعیرین آجی آیریلیغینی ائلیمیزه، «گولدورلو ولی» نین عاییله‌سینه، صابیر انجومنینه، ادبیات سئونلره، شاعیرین قلمداش‌لارینا، قوهوم اقرباسینا اورک ائویندن باش ساغلیغی وئریر.
