مساوات- احمد حسن نژاد: ورزقان – خاروانا منطقه‌سی، چوخ زنگین تاریخ و کئچمیشه صاحب‌دیر. بو منطقه‌ده نئچه تاریخی قالا یئرلشیر کی لاپ تانینمیش و آدلیم‌لاری جوشون، آغجا قالا و علی‌بی قالالاری‌دیر.
سیغیندیل کندی‌نین اورارتولارا عاید اولان داش‌دا یونولموش کتیبه‌سی، خاروانانین قدیمی مچیدی، گوی‌اوممد کندی‌نین ایلخانی‌لار دووره‌سینه مربوط اولان الله الله بورجو، اووخارانین داش دامداش بیناسی و حاماملی کندی‌نین کوهول‌لری بو منطقه‌نین اسکی تاریخیندن خبر وئریر.
دوغو آذربایجان ایالتی‌نین “کرینگان” آدلی تکجه تات دیللی کندی، ورزقاندا یئرلشیر. آذربایجان و ایرانین آدلیم مبارز چهره‌لری ستارخان و محمدتقی‌خان پسیان‌ین آتا ائولریندن، ورزقانین سردار کندی و خاروانانین سوهرون کندلرینده گوروش ائده‌بیلرسیز.
یاددان چیخارمایاق کی ورزقان- خاروانا بیر داغلیق منطقه‌دیر. اوجا داغلار، سیرت قایالار، سولو بولاغ‌لار، گور چایلار و یام یاشیل مئشه‌لر ایله یایلاق‌لاری بو منطقه‌نین هر دورد بیر بوجاغیندا گوره‌بیلرسیز.
